اپوزیشن اور ایم کیو ایم کے درمیان معاہدہ

پاکستان پیپلز پارٹی کے چیئرمین بلاول بھٹو نے اپوزیشن اور ایم کیو ایم کے درمیان معاہدہ طے پانے کی تصدیق کرتے ہوئے کہا ہے کہ معاہدے کی توثیق کے بعد آج بدھ کے روز میڈیا کو تفصیلات سے آگاہ کیا جائے گا۔
اس سے قبل ایم کیو ایم رہنما فیصل سبزواری نے ٹویٹ کیا تھا کہ پیپلز پارٹی اور ایم کیو ایم کے درمیان معاہدے نے حتمی شکل اختیار کر لی ہے. ٹوئٹر پر اپنے پیغام میں فیصل سبزواری نے لکھا کہ ’متحدہ اپوزیشن اور متحدہ قومی موومنٹ پاکستان کے درمیان معاہدے نے حتمی شکل اختیار کر لی ہے۔‘انھوں نے یہ بھی لکھا کہ ’پیپلز پارٹی کی سی ای سی اور ایم کیو ایم پاکستان کی رابطہ کمیٹی مجوزہ معاہدے کی توثیق کے بعد اس کی تفصیلات سے کل شام(بدھ) چار بجے باضابطہ طور پر میڈیا کو آگاہ کیا جائے گا۔‘
واضح رہے کہ منگل کو رات گئے متحدہ اپوزیشن نے تحریک عدم اعتماد کے معاملے پر ایم کیو ایم قیادت سے ملاقات کی، جس کے بعد ایم کیو ایم کی جانب سے پریس کانفرنس بھی متوقع تھی۔
ایم کیو ایم اور متحدہ اپوزیشن کے بعد حالیہ معاہدہ اہم پیش رفت ہے جو ملکی سیاست کی سمت کا تعین کر دے گی اور عدم اعتماد کی کامیابی یقینی ہو جائے گی.